Sipatokah

Manjua gantang balilih
Mambali gantang balanjuang
Gadang batuka jo nan ketek, nan ketek maimbuah pulo...nan kalamak untuk nyo surang,
Ciluah...., diharago lai samo tapi timbangan dimainkannyo
Takaran gantang diagiahnyo ganja
Sitokar baganti ganti, nan duduak di cc nan itu juo...mangutuak panumpang sa oto
Bak si lupak raok di buruan, cangok makan ka kanyang surang, sia mandakek kanai birunguih kalua saiang panjangnyo ....padohal basamo mangko ka rabah.
Dalam maangkek Dubalang jo Manti..
Walau mamatuih kapandaian, utak jalang karajo sungguah tapi ndak sasalero jo Sipatokah jan diharok ka tapakai...
Bialah binguang utak maampek namuah mairik aua songsang karambia rabah dipanjeknyo tapi pandai mauruik kaki Sipatokah atau santiang manjujai Ratu diangkek juo jadi Dubalang atau Manti.
Sipatokah juo bak kacang lupo jo kulik, kawan lamo disisiah dicimburui, bahkan ditundo kalua kampuang. Balupoan jaso pandayuang katiko lah tibo di subarang, lupo pulo jo jaso tanah dek manih raso tabu. Padohal mereka tu dulunyo banyak sato bajariah, basangkan bakuhampeh manaiakkan Sipatokah ka Balai Janggo.

Sumber : Rajo Sipatokah karya Yus Dt Parpatiah.